201505201229969

ئیسلامی ئەمریكی

ن: ابراهیم زمناكۆیی
لە دێر زەمانەوە ، ئەمریكا و زلهێزانی ڕؤژئاوا پلانیان بۆ ئەوە داڕشتوە كە لە وڵاتانی عەرەبی و ئیسلامیدا نمونەیەك لە ئیسلام بهێننە ئاراوە لەگەڵ بەرژەوەندیەكانی ئەواندا بگونجێت و لاواز و بێ هێز بێت ، تا ڕۆژێ لە ڕۆژان توانای بەرنگار بوونەوەی لەگەڵ ئەواندا نەبێت و بەرژەوەندیەكانیان نەكەوێتە مەترسیەوە.
ئەو نمونەیەش ئیسلامی ئەمریكیە…! ئیسلامێك بۆ لەناوبردنی ئیسلام…!! ئەو ئیسلامەی كە ئەمریكا و ڕۆژئاوای صەلیبی بۆ وڵاتانی ئیسلامییان دەوێت و بە تەمان بیخەنە شوێن ئیسلامی ڕاستەقینە…ئیسلامێك كە زانایانی پێشینی ئێمە هۆشداریان لەبارەیەوە داوە و گەلانی مسوڵمانیان لێ ئاگادار كردوەتەوە و لەبارەی مەترسیەكەیەوە دواون و پەرتوكیان نوسیوە…نەك هەر ئەوەندە بەڵكو نوسەران و بیرمەندانی ڕۆژئاوا دەیان ساڵ لەمەوبەر باسیان لێكردوە و پلانیان بۆ داڕێژاوە كە چی لە ئیسلام بكەن و پێویستە چۆن ڕووبەڕووی ببنەوە..
كاتێ سەید قطب ڕەحمەتی خوای لێبێت شەهید كرا ، ژمارەیەك لە زانایانی ئەزهەر لە سەردانێكی تایبەتدا لای شێخ محمد ئەبو زوهرە بوون ، ئەو كاتەی كە هەواڵی لە سێدارەدانی سەید قطب بڵاوبویەوە ، مەلاكانی دەربار و ئەڵقە لەگوێی دەسەڵات بەشان و باڵی سەید قطبدا هەڵیان ئەدا و ژیان نامەیان ئەهۆندەوە و بۆچوونەكانیان باس دەكرد…
شێخ ئەبو زوهره ووتی :
دوای گەڕانەوەی لە ئەمریكا پرسیارم كرد لە سەید و ووتم كوڕم حاڵـت چۆنە…؟؟
ووتی : ئەی مامۆستاكەم ،بە مسوڵمانی ڕۆشتم بۆ ئەمریكا و بە باوەڕداری گەڕامەوە…!!
لە ئەمریكا ، سەید قطب ڕەحمەتی خوای لێبێت بە چاوی خۆی بینی كە چۆن نەصرانیەكانی  ئەمریكا ئاهەنگ و سەما دەكەن و گۆرانی دەڵێن لە كاتی شەهید كردنی پێشەوا حەسەن بەننادا. هەروەها لەوێ ئەو جۆرە ئیسلامەی بینی كە ئەمریكا هەوڵی بۆ دەدات و پێی ڕازیە و تێدەكۆشێت تۆوی لە نێو وڵاتانی ئیسلامیدا بچێنێت و لەوبارەیەوە لەسەری دەنوسێت و دەڵێت :
بێ گومان ئەو ئیسلامەی كە ئەمریكا و هاوپەیمانانی بۆ ڕۆژهەڵات دەیانەوێت ” ئەو ئیسلامە نیە كە ڕووبەڕووی داگیركەران ببێتەوە و بەڕویاندا بوەستێتەوە ، ئەو ئیسلامە نیە كە دژ بە هەموو زۆردارێك بوەستێتەوە ، بەڵكو تەنها ئەو ئیسلامەیە بەرنگاری شویعیەكان ببێتەوە … ئەوان نایانەوێت ئیسلام حاكم بێت ، لەبەر ئەوەی كاتێ ئیسلام حاكم بێت…گەلانی دونیا جارێكی دیكە زیندوو دەبنەوە و تێدەگەن كە خۆئامادەكردن بۆ بەرنگاربوونەوەی دوژمنان واجبه و دەركردنی داگیركاران پێویستە ، شیوعیەت وەك ئیستیعمار دەردێكی كوشندەیە ، هەردوكیان دوژمنن و جیاوازیان نیە و هەردوكیان داگیر كەرن .
بەم شێوەیە ئەمریكا و هاوپەیمانانی ، ئیسلامێكی ئەمریكییان بۆ ڕۆژهەڵات دەوێت كە باس لە جائیز بوون یان جائیز نەبوونی مەنعی ئافرەتان و بە ئەندام بوونی ئافرەتان لە پەرلەمان بكات و باس لە دەست نوێژ و پوچەڵكەرەوەكانی بكات….، ئەوان ئیسلامێكیان ناوێت كە چارەسەری كێشە كۆمەڵایەتی و سیاسی و ئابوریەكانمان و سیستەمی دارایی وڵات بكات… بەهیچ شێوەیەك ئەوان ئیسلامێكیان ناوێت باس لە حاڵ و گوزەرانی سیاسی و نەتوەیی و لایەنەكانی پەیوەندیمان بكات . بەم پێیە جێی قبوڵكردن نیە و ناگونجێت . حوكم كردن بە ئیسلام و پەیڕەو كردنی شەریعەتی ئیسلام  و سەركەوتنی ئیسلام بەقەڵەمێك بنوسرێت و باسی لێوە بكرێت و دەنگدانی لەسەر بكرێت ئەوان دەیشكێنن و لەناوی دەبەن…
ئەمە ئەو نوسینەی سەید قطب بوو كە لە ساڵی 1949ی زاینیدا باسی ئیسلامی ئەمریكی تیادا كردبوو كە دواتر ریچارد نیكسۆنی سەرۆكی پێشینی ئەمریكا لە ساڵی 1988 لە كتێبەكەیدا (الفرصة السانحة )  جەختی لەسەر كردەوە و داوا لە ڕۆژئاوا ، لە ئەمریكاوە تا ڕوسیا دەكات كە یەك بگرن و ڕووبەڕووی مسوڵمانانی ئوصوڵگەرا ببنەوە ، ڕووبەڕووی ئەوانە ببنەوە كە ئەیانەوێت :
•     شارستانێتی ئیسلامی بگەڕێننەوە لە ڕووی زیندوكردنەوەی مێژووی ڕابردویانەوە…
•     ئەوانەی هەوڵی جێبەجێ كردنی شەریعەتی ئیسلامی دەدەن و بانگەشەی بۆ دەكەن.
•       ئەوانەی پێیان وایە ئیسلام دین و دەوڵەتە  و ئەو دوانە جیابوونەوەیان نیە.
•    ئەوانەی داهاتووی پرشنگداریان لە تێڕوانینیان بۆ ڕابردوو بەدەست دێنن ، ئەوانە پارێزگاران نین..! بەڵكو كۆمەڵێكی شۆڕشگێڕن…
ئەوە هەمان ئەو ئیسلامە ئەمریكیەیە كە بیرمەندی ستراتیجی ئەمریكی  فرانسیس فۆكۆیاما لە سەرتاكانی ساڵی 2002 دا باسی لێوە دەكات و دەڵێت : بێ گومان ئاینی ئیسلام ، تاكە شارستانیەتێكی سەرەكیە لە جیهاندا كە كێشەی لەسەر نوێگەرایی ڕۆژهەڵاتدا هەبێت ، جیهانی ئیسلامی لەم ساڵانەی دواییدا چەندین تەوژمی ئوصوڵی هێناوەتە دونیاوە ، كە نە تەنها دژی سیاسەتەكانی ڕۆژئاوا دەوەستێتەوە ، بەڵكو دژی گەورەترین بنەمای نوێگەرایی كە عەلمانیەتە دەوەستێتەوە و پێی قەبوڵ ناكرێت. پێویستە گرنگترین گۆڕانكاری لە ناو خودی ئیسلام و مسوڵماناندا بكرێت…پێویستە كۆمەڵگەی مسوڵمانان بڕیاری خۆی بدات ، كە ئایا ئەیەوێت بەشێوەیەكی ئاشتیانە نوێگەرایی ڕۆژئاوا قبوڵ بكات بە تایبەت ئەوەی كە پەیوەندی بە بنەمای سەرەكی دەوڵەتی سیكۆلاریزمەوە هەیە…. یان نا..!!؟
خۆ ئەگەر هەر تەوژمێكی ئیسلامی لە سەر خواست و بە پلانی ئەوان كار نەكات ، ئەوا دەیان ناوناتۆری جۆراوجۆری لێدەدەن و دەیان تۆمەتی ناڕەوای بۆ دەتاشن تا ڕای گشتی پێ بەدەست بێنن و  بیانویەك بێت بۆ لەناوبردنیان . ئەمریكا و ڕۆژئاوا بە هیچ شێوەیەك ڕازی نابن لە خاكی مسوڵماناندا ئیسلام حوكم بكات. ئەوان بەردەوام لە هەوڵدان تا بەهەموو شێوەیەك ئەو خەونەی مسوڵمانان نەیەتەدی و دەیان لەمپەر لەبەردەمیدا دادەنێن. ئەوان ئەو پڕوپاگەندەیەی كە بۆ ئازادی و دیموكراتیەت بانگەشەی بۆ دەكەن تەنها بۆ خۆیانە ، ئازادی لە وڵاتانی ئیسلامیدا قبوڵ ناكەن. لەبەر ئەوەی  گەلانی مسوڵمان بە گشتی كەسێك هەڵدەبژێرن كە ئیسلامیان لەسەر جێ بە جێ بكات و حوكمی خوا تەطبیق بكات. جێ بەجێ كردنی حوكمی خوا و فەرمانڕەوایی شەریعەتی ئیسلام لای ئەمریكا و ڕۆژئاوا هێڵی سورە و كەس بۆی نیە باسی بكات. ئەوان ئیسلامێكیان دەوێت كە تەنها باس لە سۆز و خۆشەویستی نێوان خەڵك و نوێژ و ڕۆژ و خێر و چاكە بكات، بەڵام كە باس گەشتە سیاسەت و دەوڵەتداری ئەوە بڤەیە و مەترسیدارە و لای ئەوان ناگونجێت لەگەڵ سروشتی مرۆڤایەتیدا..
ئەمە ئەو ئیسلامە ئەمریكیەیە كە ئەیانەوێت بیسەپێنن بەسەر گەلانی مسوڵماندا و بیخەنە شوێن ئەو ئیسلامە ڕاستەقینەیەی كە پێغەمبەری ئیسلام محمد صلی الله علیه و سلم لە لاین خواوە هێناوێتی….

سەرچاوەكان :
•    https:// wikipedia.org/wiki
•    مرايا… مستقبل الإسلام الأمريكي : عبدالله الملحم  :  http://www.raya.com/
•    الاسلام الامریكانی : د:محمد عمارە.. http://www.sunni-news.net/

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *