aanfal

ئەنفالی یەك ـ ئەنفالی دوو

چواردەی چوار ، ئەو ڕؤژە بەهاریە خۆش و ڕازاوەیە بوو كە بۆ هەتاهەتایە ڕژێمی بەعسی عەلمانی كردی بە ڕۆژێكی شوم و نەگریس و لە یادەوەری مێژووی گەلەكەماندا بە پێنوسێك لە دار بەڕوو لەسەر لاپەڕەی دەشتی گەرمیاندا دەنوسرێتەوە..
لە چواردەی چواردا بوو ئاسمانی گەرمیان پڕ بوو لە زریكە و ناڵەی منداڵان  و قیژە و چریكەی ژنان و غەم و پەژارەی پیاوانێك كە بەزۆر فڕێ دەدرانە نێو زیلەكانەوە و بەوپەڕی دڕندانە، تولەكانی میشیل عەفلەق عەلمانی لە پرۆسەیەكی وەحشیانەدا بۆ ناشیرین كردنی ئاینی پیرۆزی ئیسلام و لە ژێر ناوی پیرۆزی ئەنفالدا ، بەرەوە بیابانەكان ڕاپێچبان كردن.
منداڵان لە نێو باوەشی گەرم و پڕ لە سۆزی دایكاندا دەرهێنران و دەخرانە بەردەم سەگەكان و پارچە پارچە دەكران..پیاوان و ژنان لە یەكتر جیا دەكرانەوە و بەرەوە چاڵە قوڵەكانی مەرگ دەبران و زیندە بەچاڵ دەكران… بەدەست فیكری بۆگەنی بەعسی عەلمانی دەیان هەزار خەڵكی بێ تاوان لە بیابانەكانی عەرعەردا بە شێوەیەكی وەحشیانە و بە بەرچاوی هەموو ڕێكخراوە نێو دەوڵەتی و بەناو ئازادیخوازەكانەوە قتڵ و عام كران.. ئەوەی لە پرۆسەی بەناو ئەنفالدا ڕوویدا جینۆساید و قڕكردنیكی نەتوەیی مێژووی بوو دژ بە گەلی كورد و بۆ هەتاهەتایە  پەڵەیەكی ڕەشە بە نێو چاوی دەوڵەتانی جیهان وسیكۆلاریستانەوە.
ئەوەی جێی داخەو لێرەدا پێویستە ئاماژەی پێ بكەین ئەوەیە كە پاش 29 ساڵ ، جێماوان و كەس و كاری قوربانیانی ئەو جینۆسایدە تا ئێستاش هەر ڕەش پۆشن و لە پرۆسەیەكی دیكەی ئەنفالی دوودا ، وەك هەموو هاوڵاتیانی دیكەی ئەم هەرێمە ، لە نێو ماڵەكانی خۆیاندا ووردە ووردە زیندەبەچاڵ دەكرێن و بە هەموو شێوەیەك پشت گوێ خراوون و وەك پێویست برینەكانی دڵیان ساڕێژ نەكراوە.. ئێستاش لادێ و شارەكانی گەرمیان ئاسەواری دەستی ڕەش ڕژێمی بەعسی عەلمانی پێوە دیارە و پاش 29 ساڵ لە دەوڵەتداری ،عەلمانیەكانی ئەمڕۆ هەنگاوی پێویستیان بۆ ئاوەدانكردنەوەی ناوچەكە نەناوە..لەكاتێكدا كە مانگانە ملیۆنەها دۆلار لە پاڵاوگەكانی گەرمیان دا نەوت و گاز بەرهەم دەهێنرێت و لە لایەن بەرپرسانی ناوچەكە و حكومەتە مافیاكەی خۆمان بەتاڵان دەبرێت ، كە ئەگەر ڕێژەیەكی كەم لەو داهاتە  بۆ ناوچەكە خەرج بكرایە ئێستا ئاوەدانی و خۆشگوزەرانی بۆ كەس و كاری قوربانیان دەستە بەركرا بوو.
ئەوەی كە دوێنێ ڕژێمی بەعسی عەلمانی بەسەر گەڵی كوردیدا هەێنا، هیچی زیاتر نیە لەوەی كە ئەمڕۆ عەلمانیەكانی كوردستان بەرامبەر گەلەكەی خۆیان دەیكەن و قوت و مافی ڕۆژانەیان لێدەگرنەوە و مافەكانیان پێشێل دەكەن و سەروەت و سامانی وڵات بەتاڵان دەبەن و مافیا ئاسا كەوتوونەتە گیانی ئەو خەڵكەو ژیانیان لێ زەوت دەكەن..
ئەوەی دوێنێ بەعسی عەلمانی لە پرۆسەی ئەنفالی یەكدا بەرامبەر بە دەیان هەزار كەسی ئەم هەرێمە ئەنجامیاندا ، ئەمانەی ئێستا لە پرۆسەی ئەنفالی دوودا بەرامبەر بە ملیۆنان خەڵكی ئەم هەرێمە  ئەنجامی دەدەن..
دوێنی بەعسی عەلمانی هەزاران كەسیان لە نێو بیابانەكاندا زیندەبەچاڵ كرد ، ئێستا ملیۆنەها خەڵك بە شێوەیەكی دیكە لە نێو ماڵەكانی خۆیاندا زیندە بەچاڵ دەكرێت..لە پرۆسەی دووەمی ئەنفالدا كە ساڵانێكە دەستی پێكردوە و ئیستاش بەردەوامە ،هاوڵاتیانی ئەم هەرێمە كە بە هەموو چین و توێژەكانەوە گیانیان لە پێناو ئازادی و سەربە خۆی كوردستاندا بەخشی ، ئەوەتا ئێستا مافە سەرەتاییەكانیان لێ سەنراوەتوە و لە داهاتی وڵات بێ بەش كراون و موچەی فەرمانبەران و مامۆستایان دەستی بەسەردا گیراوە و لە هەمووی خراپتر سەرە ڕای داهاتێكی زۆر لە نەوت و گاز، مافیاكانی دەسەڵات ئەم هەرێمەیان ڕووبەڕووی قەرزێكی دەرەكی زۆر كردوەتەوە كە پاش دەیان جیل و نەوەی ئەم هەرێمی ناتوانێت لێی ڕزگار بێت… ئەگەر پرۆسەی ئەنفالی دوێنێ جینۆسایدی ناوچەیەك بێت ، ئەنفالی ئەمڕؤ مەرگەساتی نەتەوەیەكە..
ڕوو ڕەشی بۆ نەوەكانی میشێل عەفلەقی عەلمانی دوێنێ و ئەمڕۆ..درود و سڵاو لە ڕۆحی پاكی شەهیدان و ستەملێكراوانی ئەنفالی دوێنێ و ئەمڕۆ..
ابراهیم زمناكۆیی ـ 14 / 4 / 2017 ـ سلێمانی

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *