maktab rabar 052689241_n

دووفاقی دیموكراسی

سەرە ڕای ئەوەی كە دیموكراسی بە هەموو تێڕوانینەكانیەوە ، لە ناو گەلانی مسوڵماندا جگە لەوانەی كە بوون بە كۆیلەی سیكۆلار ویستانی غەرب ، شتێكی بێزراوە ، و بە هەموو شێوەیەك ڕەت دەكرێتەوە و بە سەرچاوەی هەموو نەهامەتی و ناسۆریەكانی كۆمەڵگای مسوڵمانان دەزانرێت و  بە بیانویەك بۆ لەناوبردنی گەلانی مسوڵمان لەلایەن ئەمریكا و ڕۆژئاواوە هەژماری دەكەن ، ئەگەر بە شێوەیەكی مونصیفانە بڕوانین ، بە باشی بۆمان ڕوون دەبێتەوە كە ئەو دیموكراسیەی ڕؤژئاوا و زلهێزە خوێنمژەكانی جیهان دەیانەوێت و پێیان باشە لە دەرەوەی وڵاتانی خۆیاندا جێ بەجێی بكەن ، هەمان ئەو دیموكراسیە نیە كە بۆ خۆیان پێیان خۆشە و لە وڵاتانی خۆیاندا جێ بەجێی دەكەن.
ئەوە چ مانایەك دەگەیەنێت كە ، كەسانێك لە پرۆسەیەكی دیموكراسیدا لە وڵاتانی ڕۆژئاوا دەچنە سەر حوكم و كەسانێكیش لە هەمان پرۆسەدا دەسەڵات بەجێ دەهێڵن ،  بەشان و باڵیدا هەڵدەدەن و بە پرۆسەیەكی سەركەوتوو ناوی دەبەن ..؟؟!! بەڵام ئەگەر هاوشێوەی هەمان پرۆسە لە وڵاتێكی ئیسلامیدا بەڕێوە بچێت و كەسانێك كە بابی مەیلی ئەوان نەبن سەركەوتن بەدەست بێنن ، ئەوا دەیان تۆمەتی ناڕەوا لە هەڵبژێرراوان و پرۆسەكەش دەدەن و ئاژاوە و دووبەرەكی و شەڕ و كوشتار دروست دەكەن و بۆیان بكرێت بەسەر جەنازەی هەزاران كەسدا دەپەڕنەوە و كودەتایەك ئەنجام دەدەن و شەرعیەت  و خواستی خەڵك بە ناشەرعی و دیكتاتۆریەت لەبار دەبەن.
ئەوان دەڵێن پێویستە دەنگ و ویستی خەڵك بڕیار لەسەر چارەنوسی وڵاتێك یان دەسەڵاتێك بدات . بەڵام ئەگەر زۆرینەی ڕەهای خەڵك لە وڵاتێكی ئیسلامیدا دەنگ بە كەسێك یان پارتێك بدات كە لە ژێر ڕكێفی ئەواندا نەبێت ، ئەوا ئەو پرۆسەیە لای ئەوان شەرعیەتی نیەو هەموو هەوڵێك بۆ لەنا بردنی دەدەن.
باشە بۆ دەبێ وا بێت..؟ خۆ هەمان پرۆسەیان جێ بەجێ كردووە كە غەرب دەیەوێت..؟ ئەی بۆ پێیان قبوڵ ناكرێت..؟ ئایا ئەوە ئەو دیموكراسیە نیە كە غەرب بانگەشەی بۆ دەكات…؟ یاخود دیموكراسیەكەی ئەوان تەنها دێوزمەیەكە و بۆ لەناوبردنی گەلانی مسوڵمان بەكاری دێنن..
نمونەشمان لەم بارەیەوە زۆرە . كودەتا خوێناوێەكەی میسر، كە بەسەر شەرعیەتدا بە پاڵپشتی ئەمریكا و ڕۆژئاوا كرا و هەزاران كەسی بێتاوان بە دڕندانەترین شێوە بە بەرچاوی جیهانی دیموكراسیەوە قەتڵ و عام كران و هەزارانی دیكەش لە زیندانەكان توند كران ، گەورەترین نمونەی خوێنڕێژی دیموكراسیەتە لە ناوچەكەدا. كە ئەگەر هوشیاری و تێگەیشتووی خەڵك و دەسەڵاتی توركیا نەبوایە ، جارێكی دیكە لە ناوچەكەدا شاهیدی كودەتایەكی خوێناوی دە بووین كە بە هەویری دیموكراسیەكەی ڕۆژئاوا شێلرا بوو.
ئێستاش گەلی توركیا ئەیانەوێ لە ڕێی پرۆسەیەكی دیموكراسیەوە و لە ڕاپرسیەكی گشتی دا دەستوری وڵاتەكەیان هەموار بكەنەوە و ڕیگەش دراوە بە نەیاران تا بانگەشەی دژ بوونی خۆیان بە ئازادانە ڕاگەیەنن ، كەچی ڕۆژئاوا و ئەمریكا و كۆت و پەیوەندەكانیان لەناوچەكە بە هەموو شێوەیەك دژی دەوەستن و تانەو تەشەری لێ دەدەن و بە دیكتاتۆریەت وەصفی دەكەن ، لەكاتێكدا كە بەشار ئەسەدی مەلعون مادام كەسێكی عەلمانی و كویلەی خۆیان بوو لە15 خولەكدا هەموو دەستوری سوریای سەرەوژێر كرد . هەروەها سیسی كوڕە گەورەكەی دیكەی ڕۆژئاوا هەموو دەستوری میصری بە پێی هەوا و ئارەزوی خۆی و دەست و پێوەندەكانی گۆڕی ، كە چی نەمانبینی  نە ئەوروپا و نە ئەمریكا و نە سیكۆلار و دیموكرات خوازە ئەڵقە لەگوێكانی ناوچەكەش ڕەخنەیەكیان لێ بگرن و تانەیەكیان لێ بدەن .
ئەم دووفاقیەی ڕۆژئاوا و ئەڵقە لەگوێكانیان لە ناوچەكە، تەنها لەبەر ئەوەیە كە لەوانەیە هەمواركردنەوەی دەستوری توركیا لە داهاتودا هەڕەشە بێت بۆ سەر بەرژەوەندیەكانیان و لەناوچكەدا سەرچاوەی نیگەرانی بێت بۆیان..
پێویستە ئەوانەی كە خۆیان بە سیكۆلار دەزانن و بانگەشەی دیموكراسیەت دەكەن و بە شان و باڵیدا هەڵدەدەن و پێیان وایە لەو ڕێگایەوە ئەتوانن خزمەت بە وڵاتی خۆیان بكەن ، بە ئینصافەوە لە ڕووداوەكان بڕوانن و چیتر خۆیان و كەسانی دیكەش بە ووتەی زریق و باقی غەرب هەڵنەخەڵەتێنن و خۆیان نەكەن بە كویلەی ملكەچی خاچپەرستان. لەبەر ئەوەی تا دونیا دونیایە ڕۆژئاوای خاچپەرست سەقامگیریان بۆ وڵاتانی ئیسلامی ناوێت و بەردەوام بە شوێن فێڵ و تەڵەكەو ئاژاوەگێڕیدا دەگەڕێن و تەنها شتێك مەبەستیان بێت پاراستنی بەرژەوەندیەكانی خۆیانە نەك ڕەچاوكردنی خواستی گەلان و مافەكانی مرۆڤ. ئەوان دیموكراسیان بۆ ئێمە ناوێت. ئەوان لەو ڕێیەوە تۆوی وێرانكاری و كوشتن و بڕین لە وڵاتانی ئێمەدا دەچێنن..

ابراھیم زمناکۆیی

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *